Sie sehen gerade einen Platzhalterinhalt von Vimeo. Um auf den eigentlichen Inhalt zuzugreifen, klicken Sie auf die Schaltfläche unten. Bitte beachten Sie, dass dabei Daten an Drittanbieter weitergegeben werden.
An all Honneve, ov alt, ov neu
Am letzte Daach im ahle Johr e paar Erinnerunge, wie et fröher wor beim Övverjang in et neue Johr.
Me hät domols och Silveste gefieet, ävve nit esu opjeblose un düer wie höck. Me wor fruh, wemme ene Punsch, en jot Fläsch Wing odde Sekt ze süffele hatt, wenn et huh kom en Feuerzangenbowle. Ze müffele jov et Tuffelsschlot mit heiße Wüeschche un Berliner. Fondus un Racletts komen iesch vill späde op. Privat-Füewerk hät me kaum jekannt, me kunnt et sich jo och nit leiste. Dofüe jing et huh her beim Bleijeeße. Me maht Blei övve en Käez heiß un schott et in kald Wasse. Us dä komische Forme, die dobei eruskomen, wueten de Zukunfsussichte avjeläse. Wenn et op Med-dernaach aanjing, wuet dä ein odde andere jet steller, jet nohdenklicher, wie och Franzjosef Schneider (Et Freudeblömche) in singem Jedich
„Silveste“
Et aale Johr es dud,
si Hätz satz us,
et storv an Odemsnut,
von keinem Minsch betruet,
wie et su stervend
uns noch ens aanjeluet.
Un wor doch däm ein un andere
et schönste un et letzte
in düsem Wandere.
Am Neujohrsdaach brahten de Patt un de Jot ehrem Pättche odde Jötche e „Neujöhrche“; dat wor ene jeflochtene Kranz us Heffedeich jebacke un met Hagelzucke bestreut un e bessche Täschejeld.
De Breefdräjere und Müllmänner jingen von Huus zo Huus, däten „Pross Neujohr“ sage un krähten Jeld als Neujöhrche.
Kaatbröde spillten aan däm Daach in de Wietschaff öm Neujohrskränz.
Wie de Minsche fröher wönschen ich Üch höck all von Hätze e jlöcksälig Neujohr!
